BANNER_WEB_2018_FONDO

AURKEZPENA

Ongi etorri guztioi!

Beste urte batez, ohore handia da niretzat horrenbeste hunkitzen nauen jaialdi honetako agurra egitea.

14 urte bete dira lehenengo edizioa antolatu zenetik. Lan, esfortzu eta ilusio handiari esker lortu dugu kalitatezko kultur jaialdi hau antolatzea, beti ere mugarri batekin: sexu-, nortasun- eta genero-aniztasunaren inguruko sentsibilizazioa eta integrazioa lantzea.

Zinegoaken lan egiten dugunok argi daukagu hau ez dela bakarrik zinemagintzarekin lotutako topagune bat. Gurea hausnarketarako gunea da, kulturari eta ikus-entzunezko sorkuntzari zabaltzen diogun leihoa. Gure jendarteetan aniztasun handia dago, eta guk horrekin hunkitu, ikasi eta gozatu nahi dugu.

Aniztasuna bere zentzurik zabalenean ulertzen dugu: maitatzeko moduan, edozein motatako harreman afektiboetan, adierazteko moduan edota genero-planteamenduak lantzerako orduan. Aberastasun hau modu erakargarrian aurkeztu nahi dugu, tonu atsegina mantenduz eta aukera dagoenean, dibertigarria eginez. Noski, batzuetan giza eskubideen urraketa ere bere gordintasun osoarekin erakutsi eta salatu behar dugu. Izan ere, oraindik orain munduko herrialde askotan maitatzea zigortuta dago, emozioei kasu egitea eta horren arabera agertzea zigortua dago.

Era berean, aniztasuna, nortasuna eta generoa bezalako kontzeptuak urrun samar sentitzen dituzten zinemazale horiek ere erakarri nahi ditugu, denok jaialdiaz gozatzeko aukera izan dezagun. Hori dela eta, egitarau honetan murgiltzera gonbidatu nahi zaituztegu, seguru gaudelako zuen gustukoa izango den jardueraren bat baino gehiago topatuko duzuela.

Zinegoak handitu egin da, egun kopuruari dagokionez oraingoan. Kontua ez da film eta jarduera gehiago antolatzea, baizik eta jarduerez gozatzeko aukera gehiago ematea, bi asteko programazioa antolatuz.

Urtero zuen aldetik jasotzen dugun harrera bikaina eskertu nahi dizuegu. Benetan, eskerrik asko. Gero eta gehiago zarete Bilboko hainbat bazterretan antolatzen ditugun jardueretara gerturatzen zaretenak, edo martxoan zehar Euskal Herri osoan antolatzen ditugun 40 proiekzio baino gehiagoetara hurbiltzen zaretenak. Hori da, hain zuzen ere, jaialdi honen arrakasta. Zuen parte-hartzea, aretoak leporaino betetzea eta edizio bakoitzean gure programarekin gozatzea.

Guk lanean jarraituko dugu, ikus-entzunezko proposamenik erakargarrienak antolatzeko asmoz eta, Zinegoaken bidez, aniztasuna kulturaren bidez jorratzeko helburuarekin.

Pau G. Guillén

Zuzendaria