BANNER_WEB_2018_FONDO

KLASIKO IKUZTUAK AGERIAN

Duela urte batzuetako ildoari jarraituz, Zinegoakek obra klasikoak gogora ekartzen ditu, bere garaian nabarmendu ez zirenak edo, urteak igaro ahala ospetsu bihurtu diren arren, orduan oihartzunik izan ez zutenak.

Horren bi adibide garbi ditugu aurten:

Batetik, Walk on the Wild Side (La gata negra, Edward Dwytryk, 1962). Zuzendariaren film ezezagun eta polemikoenetariko bat da, eta bere garaian iskanbila handia sortu zuen. New Orleanseko bazter-zuloetako prostituzio-etxe batean girotutako istorio izugarria da. Bat-batean, lesbianen arteko ageriko istorio batek txunditu egingo gaitu; lehenetarikoa zinema estatubatuarrean, Hays autozentsurako kodea indarrean zegoenean oraindik. Txundigarriak ere Jane Fonda eta Anne Baxterren antzezpen apartak, Saul Bassen kredituak eta Joe McDonalden argazkia.

Bestetik, Victim (Víctima edo Los vulnerables, Basil Bearden, 1961), oso film esanguratsua alderdi soziologikoari dagokionez, izan ere, eragin handia izan zuen homosexualitatea onartzeko bidean Erresuma Batuan. Victim filmak jarrerak askatzen lagundu zuen eta, ondoren, britainiar legean eragin zuen, 1967ra arte harreman homosexualak, nahiz eta helduen artekoak izan, debekatuta baitzeuden. Ez da lan borobila, Dirk Bogardek antzezpen aparta egin arren -Bafta sarietarako hautatua izan zen-, bai, ordea, nabarmendu beharrekoa, militantziaren aldetik.