Jaialdia

Zinegoak, Bilboko LGTBIQ+ Nazioarteko Zinema eta Arte Eszenikoen Jaialdia, 2004an sortu zen, kulturaren, zinemaren eta arte eszenikoen bidez sentsibilizazioa lantzeko tresna bat izateko asmoz. Ordutik, eraldatuz joan da, harik eta estatu eta nazioarte mailan erreferentziazko kultura-ekitaldi bihurtu arte. Lau esparru handitan antolatzen da jaialdiaren jarduna, eta aldi berean mamitzen dira laurak, batez ere ekainaren amaiera aldera, Bilbon, baina Euskal Herriko beste herri batzuetara ere iristen da, maiatzetik ekainera bitartean.

Proiektuaren ardatza zinema eta arte eszenikoen jaialdia da, arretaz hautaturiko proposamen queer garaikideak biltzen dituen ekimena: lan eszenikoak eta ikus-entzunezkoak –film luzeak, film laburrak eta dokumentalak–, haietariko asko sariketa prestigiodunetan parte hartutakoak. Edizio bakoitzean, gainera, Ohorezko Saria ematen da, LGTBIQ+ zinema eta aktibismoko funtsezko pertsonen ibilbidea aitortzeko, eta nazioarteko epaimahai bat izendatzen da, ikus-entzunezkoen eta queer-aren esparruko profesionalek osatua.

Ardatz nagusi horrez gain, ZG PRO industria-atalak topaketa profesionalak eta masterclassak antolatzen ditu, iruditeria kolektibo ez-normatiboen garaikidetasunaz eta ahalmen eraldatzaileaz hausnartzeko. 

Sentsibilizazio eta audientzien garapen atalean, ZG Hedapena eta ZineGogoak programen bitartez, askotariko publiko eta lurraldeei gerturatzen zaie aniztasuna; eta, azkenik, eztabaida- eta pentsamendu-atalean, disidentzietatik habitatzeko eta egiteko beste modu batzuei buruz gogoeta egitea aldarrikatzen duten proposamen artistiko eta kulturalak biltzen dira.

Programazio osoa sexu-, genero- eta afektu-aniztasunaren gaineko begirada kritikoz eta konpromisoz eraikitzen da. Lau haizeetara aldarrikatzen ditugu ihes egiten duten identitateak, deserosotasuna eragiten duten desirak, txertatzen ez diren gorputzak eta, oro har, bazterretan bizi den oro, ez soilik bazterrak ulertuta bazterkeria-eremu gisa, baizik eta baita beste errealitate batzuk eraiki, zaindu eta sostengatzeko esparru gisa ere. Egitura hegemoniko, patriarkal, kolonial eta kapazitisten aurrean, geure erara buru egiten, imajinatzen eta existitzen utziko diguten sare –afektibo eta politiko– propioak ehuntzeko apustua egiten dugu.